ЖИГИТ

Кыргызча жигит сөзү эр жеткен уландарга карата айтылат. Алтай тилинде йиит кыс деп, бойго жеткен кыздарга карата да колдоно берүүгө болот. Мына ушул жигит сөзү байыркы түркчө йетик сөзүнүн т жана к тыбыштары орун алмаштырып, метатезаланган: йетик>йекит. Эки үндүүнүн ортосундагы к тыбышы кыргыз тилинде жумшарса, алтай тилинде түшүп калган: йегит>йигит, йиит. Жигит болгондо адам балалык доорду өткөрүп, жетилет. Чоңоюп калган уулдарга карата жигит болуп калыптыр деп айтышыбыз бекеринен эмес, жигит сөзүнүн өзү жет+ик морфелаларынан куралган. Эр жеткен же бойго жеткен кез баланын жетилгени болот. Ошондуктан жигит сөзү алгачкы жет сөзүнө зат атооч жасоочу -ак мүчөсү улануудан жаралып, жетилген курагына туура мүнөздөмө катары айтылган сөз болгон. к. жетик