Кыргызско-русский толковый словарь юридических терминов и понятий (2005)
ИШКАНА – КР жарандык мыйзамдары боюнча жарандык укуктардын өзгөчө объектиси, ишкердикти жүзөгө ашыруу үчүн пайдаланылуучу мүлк комплекси. И. курамына, эгер мыйзамда же келишимде башка жагдайлар каралбаса, анын ишмердиги үчүн пайдаланылуучу жер участокторун, имаратты, курулмаларды, жабдууларды, инвентарларды, чийки заттарды, продукцияны талап кылуу укуктарынын карыздары, анын ишин айырмалоочу белгилерди (фирмалык аталышты, товардык белгилерди) жана башка өзгөчө укуктары менен кошо баардык мүлктөрдүн түрлөрү кирет. И. бүтүндөй же анын бир бөлүгү соода-сатык, күрөө, ижара, буюм укуктарын белгилөө, өзгөртүү жана токтотуу менен байланышкан жана башка бүтүмдөрдүн объектиси болушу мүмкүн.

Кыргызско-русский толковый словарь юридических терминов и понятий (2005)
ИШКАНА САТУУ КЕЛИШИМИ – сатуучу, ал өзү башка бирөөгө беришке акысы жок укук жана милдеттерден башка, ишкананы бир бүтүн комплекс катары сатып алуучунун менчигине өткөрүп берүүгө милдеттенген соода-сатык келишиминин өзгөчө түрү. Фирмалык аталышка, товардык, кызмат көрсөтүү белгилерине, сатуучуну жана анын товарларын, жумуштарын жана кызмат көрсөтүүлөрүн айырмалоочу башка каражаттарга укук, ошондой эле ага лицензиянын негизинде гана тийиштүү болгон айырмалоо каражаттарына укук, келишимде башка жагдайлар каралбаганда гана өтөт. Сөзсүз жазуу жүзүндө болуусу, мамлекеттик каттоодон өтүүсү И. с. к. өзгөчөлүгү болуп саналат.