Фразеологический словарь кыргызского языка (2015)
1. Каралашуу, жардамдашуу, жардам берүү, кам көрүү. Өмүрлүү бол, зоболоң көтөрүлсүн, балдарга көз кырыңды сала жүр деген батасына тоюнду (Ашымбаев). Шордуу жетимчемдин сенден башка кимиси бар. ...Көз кырыңды сала жүрөрсүң, - деди Акбала өзүн кармай албай ыйлап жиберип (Укаев). 2. Бир нерсени байкоо максатында көз жүгүртүү, астыртан кароо. Анан Сабырбек тамекисин тарткан болуп, бирок астыртан Бекбайдын жүзүнө көз кырын салып отурду (Абдыраманов). А офицер улам ага көз кырын салып, кайра алдындагы бирдемеге күймөлүп, колу ойсоңдоп, кайра көз кырын салып, кайра өзүнчө үңүлүп отурат (Касымбеков).