адам

I зат. Ойлоо жана сүйлөө жөндөмдүүлүгүнө ээ болгон, өндүрүш куралдарын иштеп чыгып, аны коомдук эмгекте пайдалана алуучу тирүү жан, киши. Турмуштун ачкычы адамдын өз колунда тура (Сыдыкбеков). Космоско барган биринчи адам — советтик адам, Советтик Социалисттик Республикалар Союзунун гражданини! («Советтик Кыргызстан»).
♦ Адам баласы — адамзат, дүйнөдөгү, жер жүзүндөгү кишилер. Адам болуу — эр жетүү, киши катарына кошулуу. Адам күнү — бир жумуш күнүнүн ичиндеги бир адамдын иштеген жумушунун өлчөмү менен эсептеле турган жумуш убактысын эсепке алуунун единицасы. Адам ата — диний түшүнүк боюнча: дүйнө жүзүндө эң биринчи пайда болгон адам.
АДАМ II сырд. Таң калгандыкты билдирүүдө колдонулат. — Адам, биздин жолоочулар менен бирге, былтыркы Мыскал деген кыз келиптир (Сыдыкбеков).